吴雨霏新粤语歌推介.

发布时间:2022-01-16 13:22:42






 



日前倾到嘅强迫症成为呢个城市嘅风土病,係因为城内嘅人们唔识放松。听到某些关键字眼,就会出现小脑神经反射动作。不禁叹道:由何时开始,我哋会变咁?



讲到底,我哋就欠缺咗一样最大嘅能量——「爱」。



当然,要讲嘅爱,并不仅流于男女之间,唔係停留喺爱情嘅层面,一吻过后就可以开启「无双」模式降魔伏妖。呢种爱,并唔係只爱身边嘅人,而係一种无等差嘅爱,乃至对物件嘅爱。呢种爱,唔係恋爱,唔係爱慕,而係爱护。原则上,呢种爱就係尊重。



但係,我哋呢个城市,确实欠缺咗爱。取而代之,就係一浪接一浪嘅批评声音。


不管你为何瞒骗我 仍敞开心 倾听你恐惧

不管你为何嫌弃我 仍伸出手 轻擦你的泪



坦白说,自己亦都唔可能做到。无论喺边度,但凡係能留言、能评分嘅地方,人哋总爱大肆批评,总係使出洪荒之力,喺鸡蛋里挑骨头,先至能显得自己口味独特、品格高尚。喺乜时候,评论开始变成咗一定要批评,再容唔落赞美嘅声音?



例子不必外求,音乐就係其中之一。广东歌对比其他地方嘅音乐,其实毫不逊色。只係,有更多嘅人,听到作品采用咗某些编曲,乃至用上同一拍子,小脑神经反射动作立时出现,到处留言,谴责係抄袭作品。但事实上,相同嘅地方只係所选嘅音乐类型。



仍确信这里美好的 拥抱身边惶恐的

沿途添漂亮颜色 神采不会被磨蚀

来一起继续寻觅



要改变这窘局,靠嘅就只有「奉爱之名」,以文字为读者益友们送上好音乐。今天介绍嘅《奉爱之名》,当係其中一首。婚后嘅吴雨霏经历过人生起跌后,发现「爱」,除咗係最大权利外,仲係解决世上难题嘅一股力量。久休过后重新出发,以为Kary仲好似以前那样又再推出惨情歌吗?有咗爱嘅力量,佢亦都唔再惨情。



相比起固步自封,以 K 歌赚取播放率同乐迷嘅点击率,Kary 更想突破自己,尝试更多唔同风格嘅音乐。扬言要「重质不重量」嘅佢,决定今年只做两首歌。无独有偶,两首作品都听唔到典型嘅K歌元素,倒係有D电子味道。呢个年代,EDM 盛极一时,Kary 同 Alex Fung 合作嘅复出作《Come With Me》就係其一。



可能人哋会话,Kary 一直以嚟亦都係跳唱歌手,EDM 作品如恒河沙数,又有何突破?咁同样由 Kiri T 编曲、Alex Fung 监制嘅呢首《奉爱之名》,就係最好嘅回应。



喺《奉爱之名》当中,Kiri 喺编曲时所加上嘅电子元素,为旋律带嚟咗飘渺感觉,却同时令乐迷感受「爱」呢种力量嘅伟大,就係大得咁虚空,充斥住成个空间,每一下嘅鼓声,都变得踏实。



担起这个使命必经几次苦等 所以坚忍

难得我这片黑暗总算有灯 这个躯壳总算有心

谢谢还爱我的人 绝望时抱过我的人



Kiri 嘅和唱,亦都令 Kary 呢首歌更为立体。但想 Kiri 之所以出走,却係因为喺香港乐坛发展时感到沮丧。有时候唔係唔创新,但大家却最爱动辄批评,以彰显自己嘅眼光、品味係如何独到。



我要看见这里所有人 互传一声慰问 从此不记恨


「奉爱之名」写下这千字,冀望乐迷们能获「爱」嘅真谛,尊重、欣赏香港嘅制作,挽留有志气、理想嘅本地音乐人。先至可以令香港乐坛不灭,乐迷们唔会大呼「乐坛已死」,就係我呢种「音乐本土派」存在嘅目的。



撰文:阅评流





我们的粤语,正在消失

如果你热爱粤语

请转发

多一个人转发,多一分力量



Copyright © 上海粤语新歌榜联盟