点击上方 ↑↑ 即可关注「金句王」

近日Sammi就喺红馆开紧《Touch Mi 2郑秀文世界巡回演唱会2016》。而佢好多经典快歌、慢歌，都系陪伴住好多人一齐成长～

Sammi唱咩歌入行？答案系叶蒨文嘅《干一杯》！1988年，Sammi只有15岁半，就参加新秀赢得季军，后来读完书毕业先至入行。

Sammi出道歌系同吕方合唱嘅《珍惜这一刻》，好多人未必知道，但有时唱K必点嘅《火热动感La La La》，就有好多人都识背识唱！

另一首Sammi必点老歌（至少廿年以上），肯定包括经典情歌嘅《其实你心里有没有我》，绝对系Sammi同许志安嘅订情安歌。就连今次Sammi演唱会嘉宾阿子华神都要重新解读呢首歌嘅歌词，你话经典唔经典？

贵为90年代最受欢迎嘅女歌手，Sammi出名大胆，染金毛、Nike眉等等，形象百变之余，几乎每首快歌都极受欢迎，93、94年间唱过嘅《Chotto等等》、《叮当》、《十诫》、《热爱岛》，超快超经典。

快歌拿手之余，始终情歌慢歌最能留住歌迷。1995年转投华纳，一连串超成功嘅广告歌《舍不得你》、《放不低》，或者电视电影主题曲如《不拖不欠》等等，首首情歌首首揪心，怎能不识，怎能不唱？

或者因为形象百变，又可能唱失恋歌太惨，Sammi比其他女歌手唱得更多女权主义嘅歌，例如《男士今天你很好》、《小心女人》、《非男非女》，好多女仔唱K时唱得特别起劲！

1996年绝对系Sammi踏入高峰期嘅一年，首次举行红馆演唱会，亦首度夺得最受欢迎女歌手，其后接连续冧庄得奖，再破红馆个唱纪录。

唱片销量双白金接踵而来，《默契》、《我们的主题曲》、《亲密关系》、《插曲》，要继续讲下去，有排讲有排唱。

到咗千禧年代嘅Sammi，再创演艺高峰，同刘德华合演最佳情侣，《孤男寡女》、《瘦身男女》等等叫好叫座，主题曲《感情线上》、《终身美丽》亦一样受欢迎。

电影带动主题情歌，但Sammi嘅快歌喺千禧年更进一步，升华至电音女皇嘅美誉，一首首粤语及国语舞曲大卖中港台各大热唱榜。

分别有点题作《独家试唱》、《煞科》、《发热发亮》等等，演唱会经常听到。

高峰过后，经历《长恨歌》一役，病倒咗嘅Sammi喺2007年以演唱会重生，堪称演唱会嘅经典演绎，2009年更推出福音大碟《信Faith》，一改福音歌嘅旋律，一举创下香港8年来最畅销嘅唱片纪录，首日即取得白金销量。

最后卖出超过15万张，《信者得爱》、《罪与罚》都令人刮目相看。

强势回归之后，近年Sammi成为许太之后更顺风顺水，每次演唱会都一票难求，大获好评！

金句王

微信号：jinjuking

睇金句王，爽过去爆房！
每日发布粤港澳第一手开心嘢！
粤语 | 爆笑 | 搞嘢 | 吹水 | 抵死 | 顶瘾

欢迎搭讪 投稿都啱 合作更赞 小编微信: KingKingGuy